 ORASHON
Tin un tentashon ku semper ta stroba nos bida spiritual, esta pensa ku tur logro i resultado ta dependé di nos mes kapasidatnan i di nos programashon. Sigur sigur Dios ta pidi nos un kolaborashon real na su Grasia i tambe ta invitá nos pa hasi uzo di tur medio di nos inteligensia i kapasidatnan den nos trabou; pero, nos no por lubidá ku sin Kristu Hesus nos no por hasi nada: Huan 15,5 : Ami ta e Mata di wendruif, i boso ta e ramanan. Esun ku ta keda den Mi, mientras Mi ta keda den dje, ta karga hopi fruta, pasobra alehá for di Mi boso no por hasi nada.
Orashon ta hasi nos biba e berdat aki; ta rekordá nos konstantemente ku Kristu ta okupá e promé lugá den nos bida spiritual, den nos afan pa hańa felisidat. Orashon ta manera kombustibel pa un kreyente.
1 Tesalonisensenan 5,16-18 : Sea semper kontentu, resa konstantemente, yama Dios danki bou di tur sirkunstansha, pasobra esei ta loke Dios ta deseá di boso komo hende ku ta kere den Kristu.?
Resa sin kansa no ta nifiká ku nos mester resa 24 ora pa dia sin stop, al kontrario, ta nifiká hasi tur kos den Nomber di Seńor. Ora nos ta resa, Spiritu di Dios ta intercedé, ta boga pa nos serka Dios Tata, ekspresando nos deseo i pensamentunan ku nos no por ekspresá ku palabra.
San Agustin a bisa ku Orashon ta manera un ehersisio pa nos alma: Resa pensando ku tur kos ta dependé di Dios, aktua pensando ku tur kos ta dependé di bo.
Mateo 7,7-11: Pidi i boso lo risibí; bati i porta lo habri pa boso. Pasobra ken ku pidi lo risibí; ken ku buska lo hańa; i ken ku bati porta lo habri p’e.
Dios ta eksihinos nos tres kos i ta primintí nos tres kos: si nos ta pidi, lo E kontestá nos; si nos ta buska; lo e topa ku nos; si nos ta bati, lo E habri pa nos.
Pidi : ta un ekspreshon di deseo di nos alma, di anhelo. Den nos tempu moderno Dios ke pa nos sigui pidi i resa ku perseveransha.
Buska : ta nifiká kana un tiki mas leu ku pidi, ke men, nos ta sali buska e kontesta di Dios.
Yama : Ta nifiká ku nos mester traha pa mira e resultado di nos Orashon.
Orashon, mi rumannan ta manera un lampi di koriente, nos por send’é of pag’é, pero si e no ta hinká den koriente, si e no ta risibí energia, e no ta funshoná; kada Orashon ku nos ta hasi, por of no por tin poder, ora e tin poder nos ta los un poder ku por pone tera tembla. Hakobo ta bisa nos: orashon di un hende ku ta biba di akuerdo ku boluntat di Dios tin un resultado tremendo. Hak.5,16.
Boso Pastor amigu:
Rev. Gregorio Rafael López Mora.
Parokia San pedro, Pastorie Westpunt,
Tel. 864 00 80
|
